Baraza la sita la Wafanyakazi limezinduliwa na Mhe. Upendo Wella, ambapo Eng. Mayunga Kashilimu ambaye ni Mkurugenzi Mtendaji wa TUWASA na kwa nafasi hiyo pia ni Mwenyekiti wa Baraza la Wafanyakazi – TUWASA ameeleza muundo wa baraza hili ambao una husisha Mwenyekiti, Katibu wa TUGHE (M), Mwakilishi wa Wizara ya Maji, Wajumbe wa Menejimenti ya TUWASA na wawakilishi wa Kurugenzi tatu ambazo ni  Huduma kwa wateja, Rasilimali watu na Utawala na Usambazaji maji na usafi wa Mazingira.

Aidha Eng. Mayunga amemshukuru Mhe. Upendo Wella kwa ushirikiano anaoupata katika ofisi yake pale anapopata changamoto TUWASA na kwa ujumla wake amemshukuru Mhe. Dkt. Samia Suluhu Hassan Rais wa Jamhuri ya Muungano wa Tanzania kwa kuitazama Tabora kwa jicho la karibu kwa kuiwezesha katika utekelezaji wa miradi ya maji na hadi sasa mradi wa maji wa miji 28 kupeleka maji Sikonge Urambo na Kaliua unaendelea vizuri. Mradi huu unagharimu kiasi cha shilingi bilioni 143.26.

Aidha Wakili Robert K. Nkungwe Afisa kazi (M) ameeleza kuwa TUWASA ni mfano bora wa kuigwa kuhusu uundaji wa mabaraza na amesisitiza kuwa Baraza linaweka uwanda mpana wa majadiliano yenye tija ili kufikia malengo ya taasisi.

Pia Dkt. Charles C. Milambo Mwenyekiti TUGHE (M) ameeleza anatambua Baraza hili limeundwa kisheria na linaongeza demokrasia kwa watumishi ambao wanatakiwa kuwajibika vema kwenye majukumu yao na kuwa na utii.

Mwakilishi wa Wizara ya Maji Bi. Grace H. Lyangamba ameeleza umuhimu wa Baraza kuwa linaongeza ushirikiano, uwazi na uwajibikaji na ameipongeza TUWASA kwa kuzindua Baraza hili muhimu la Wafanyakazi.

Bw. Dick Mlimuka ambaye ni Mwenyekiti wa Bodi ya Wakurugenzi TUWASA aliwakumbusha Wajumbe wa Baraza kuhusu uwajibikaji na kutozoea shida za watu kwa kuwa maji hayana mbadala ni vema kutimiza wajibu ndipo udai haki.

Mhe. Upendo alilielekeza Baraza la Sita la Wafanyakazi kuhakikisha linashauri vizuri namna bora ya kuongeza wateja wapya na kupunguza upotevu wa maji kutoka asilimia 28.

Alimalizia kwa kuwataka watumishi  kuwa na lugha nzuri kwa wateja, kufanya kazi kwa uadilifu, kutatua kero za wateja kwa wakati, kutoa huduma kwa ufanisi na kuwataka wanaotumia maji kinyume na utaratibu kuacha mara moja kwa kuwa ni hasara kwa TUWASA